行！看戲--looh！
作者 ：#陳育萱(「樂暢親子共學空間」ê頭家 )
今年93歲ê明華園，有一个由陳--家第三代陳昭賢成立ê子團號做「風神寶寶兒童劇團」，到tann已經成立十週年--ah！團名ê唸法是「Hong-sîn ㄅㄠˇㄅㄠ」是kā台語kah華語鬥--起-來；bat聽別个家長講囡仔真kah意tsit團ê演出。
兩年前，阮tshuā囡仔興tshuh-tshuh專工去看in一齣《晴空小侍郎》，hit齣戲是改編哲也ê華文青少年小說。演出雖然真精彩，m̄-koh規齣戲大量使用華語、歌仔戲ê元素大量減少，án-ne歌仔戲kám koh叫歌仔戲？Iah是「歌仔戲風味ê兒童劇」？看了心內實在有夠艱苦，台頂台跤lóng leh講華語，hit時我感覺台語就beh無--去--ah。
細漢ê時，阿祖tshiah膨紗，阮tī邊--a無代誌做，hit-tsūn蹛tī山頂，khah無看外台ê經驗，lóng是看電視，tuì三台看kah有第四台出現，m̄是tè leh看歌仔戲，就是看布袋戲，一定ài講台語，老大人tsiah聽有。阮做囡仔ê時，看歌仔戲是流行，無需要完全lóng看有，是tè leh感受氣氛；看歌仔戲，bat是我生活經驗ê一部份。
明華園ê戲，我可能無看過幾齣，m̄-koh明華園tī我心目中，是台灣獨一無二，tsiok有代表性ê大明星。In陳--家是家傳五代，m̄ bat離開tsit个產業ê家族，是台灣歌仔戲ê金字招牌！Ài傳承koh ài創新，愈老牌顛倒肩胛頭愈重，beh按怎保持水準，繼續向前行，一直經營--落-去，是真無簡單ê代誌。
風神寶寶ê團長陳昭賢進前受訪問ê時tsūn講，為著hōo觀眾改變對劇場、對傳統戲劇ê看法，希望ē-tàng tuì囡仔開始培養新ê觀眾。伊創立tsit个兒童劇團，用華語來演出，一定ài hōo觀眾「看有」。保留歌仔戲ê元素，去全台灣ê國小，sì-kè巡迴推廣，做tsit款改變，壓力不止仔大。
以演出ê方式來討論，對大部份ê台灣人來講，khah bē慣勢khai錢去劇場看表演，無論音樂會、舞蹈、戲劇tsit類ê藝文活動，lóng kah電視、電影、網路影片hit款大量媒體傳播ê速度bē比--得；m̄-koh無論佗一種形式ê現場表演，上大ê特色就是逐場lóng無仝款，就算仝一批演員來搬，演員當時ê狀態、觀眾ê反應lóng有可能無仝，tse就現場演出迷人ê所在。
Tsit-má真濟傳統劇團，tuì外台改換型態，變做內台ê方式演出，觀眾對藝術欣賞ê眼光，願意付錢去看表演，認同劇團ê付出，知影按怎欣賞，tse lóng是需要時間來培養--ê。古早時代是無選擇，tsit-má是選擇siunn濟，án-ne講--起-來，培養戲迷是無分時代--ê——有觀眾，tsiah ē有劇團。
以語言ê角度來思考，戲劇用啥mih語言kám是影響觀眾願意去看ê原因？去美國看『百老匯』（Broadway）、去意大利看歌劇、去日本看能劇，kám ē因為聽無就無愛去看？就算中國ê京戲好--ah，若無字幕，聽bē慣勢ê人，凡勢mā聽無in leh唱啥。可能我自細漢就慣勢歌仔戲講台語，就算保留唱調，tī《晴空小侍郎》ê演出內底，大量使用華語，台語ê比例少kah bē輸tī「湯頂kuân掖胡椒」，情感上實在真歹接受。
無論是演出、講囡仔古ê podcast，「風神寶寶兒童劇團」差不多lóng是講華語。慣勢華語歌仔戲ê群眾，落尾kám有法度koh接受全台語ê演出？Iah是ē kah我仝款礙虐？Tse mā無一定--neh。一寡本土語言ê演出到底是無票房？Iah是行銷宣傳無揣著適合ê群體？值得認真做戲ê戲劇人共同來思考。
明華園總團一直堅持用全台語演出，m̄-koh，我m̄知歌仔戲講台語有啥mi̍h好thang講--ê，因為歌仔戲主要ê語言本來就是台語，台語是歌仔戲ê靈魂；leh看別个歌仔戲團演出ê時，確實是年歲khah大ê觀眾khah濟，hōo囡仔看ê歌仔戲，用華語摻一屑屑仔台語，自細漢無機會聽著台語，大漢哪有可能雄雄就ē-hiáu？若是án-ne，等老輩ê觀眾lóng過身了後ē按怎？
Tī台灣，商業劇團ê經營已經真無簡單，傳統戲劇kah一般商業劇團拄著無仝款ê困境，相信無論明華園iah是「風神寶寶」，一定是經過tsiok濟考慮、tsiok骨力拍拚，tsiah ē做出今仔日tsit款選擇。M̄-koh，若是連台灣唯一ê兒童歌仔戲團，to無法度提供囡仔台語歌仔戲ê養份，做家長koh thang ǹg望啥人？Kám是我標準siunn kuân？真正tsiok希望台灣上無ē-tàng有一个做hōo囡仔聽台語ê歌仔戲團。
後--來，「風神寶寶」做一齣以三國演義改編ê故事《柏桑村》，阮表兄演內底一个角色，叫我tsit擺先看了tsiah-koh講。大部份ê觀眾看--起-來是家長tshuā國小ê學生khah濟，mā有老師，有歲ê人khah少。幕iáu未khiú--起-去，ta̋nn起鼓niâ，我就kiōng-kiōng-beh哭--出-來：「Tio̍h--lah！就是tsit味--lah！」雖然iáu是講華語khah濟，m̄-koh講台語ê比例有khah kuân--ah。看到第五場，我tsiah發現，逐場lóng出現，kah劇情無一定有直接關係，穿kah suí-tang-tang，自頭到尾一直唱台語ê三个人，竟然是「歌隊」〔1〕 --啊！
規齣戲連阮翁to感覺真趣味，內容應該ài國小以上tsiah khah有法度理解，國小以下是看興趣培養，lóng真好。照tsit个pān勢，無的確未來ē有一、兩場是全台語--ê。Tsit擺看了實在真歡喜，真正m̄免驚囡仔聽無，in聽無ê部份，就算講華語in mā是聽無--lah！到底「聽無」kám有hiah-nī嚴重？若論浸水式ê做法，是無論語言學習、培養感情、起造環境lóng需要時間，無可能看一場演出，就ē-tàng一世人變死忠劇迷，to m̄是中毒講。
Tsit齣戲ê導演許栢昂有講著多語言使用ê情形，我真好奇tsia-ê語言之間ê關係。語言m̄是濟就好，譬如講規齣戲一直講著一句「おはよう」，kám算有聽著日語？是按怎lán tī tsia ài講日語？講講--leh lām一、兩字英語，kám有啥mih意義？
我感覺lām了合理、想beh看現場--ê是台北木偶劇團《白賊燈猴天借膽》，講台灣過年ê沉島傳說，用客話、台語來演出，是以古早時代ê台灣做背景ê布袋戲故事。人物角色lóng是講規句規句，就算聽無客話，mā ē-sái聽看māi，看劇情臆看māi，有需要ē-tàng看字幕；ài知影lán ê囡仔mā m̄是出世就聽有華語，只要對內容有興趣，日語、甚至西班牙語in lóng照學、照講。
Hōo囡仔ê內容，做全台語m̄是bē做--得！是真歹做無m̄-tio̍h，m̄是無人leh做。親像Ló-lí-á劇團（『夾腳拖劇團』），in ê podcast《故事雜菜羹》用台語講囡仔古，有品質koh有深度。In小型、大型ê表演lóng是用台語演出。而且，in對原住民各族語、客語、台灣手語等其他ê本土語言，lóng有盡量照顧，án-ne真好，ē-tàng真正hōo囡仔了解tsit phiàn土地。
阮蹛ê所在，客語kah原住民各族語，lóng無機會tī生活中聽--著，當然無可能透過一、兩擺ê活動就ē-hiáu講。透過tsia-ê機會，ē-tàng hōo囡仔知影講，台灣是有多元文化、多語言ê所在，lán對無仝語言，就算聽無，mā應該平等對待、互相尊重。阮絕對m̄是認為，全台灣ê囡仔kan-na ē-sái講台語。
Mài講啥mih本土語言復振、語言平權，華語kah英語確實tsiok強勢，選擇hiah-nī濟，做華語--ê mā無一定好做。歌仔戲是明華園ê特色kah品牌資產，「兒童歌仔戲團」就是一種差異化經營，mài驚囡仔聽無台語，無講一定聽無！台語ê「兒童歌仔戲團」無人有才調做， 若是「風神寶寶」做了好，規碗lóng是lín ê--啊！Kám m̄是？
煞戲ê時，團長陳昭賢抱囡仔出來謝幕，我bē輸看著Ló-lí-á劇團ê團長吳易蓁，koh有tsiok濟為著傳承母語tsiok骨力拍拚ê爸母。歌仔戲是我性命經驗ê一部份，明華園猶原是我心目中tī台灣有代表性ê劇團，有感情tsiah ē tsiah-nī仔期待，期待「風神寶寶劇團」未來十年，愈做愈好、愈行愈在！
1.古早希臘戲劇內底，tī舞台頂一陣專門負責唱歌、跳舞ê人，有時mā有台詞。
---------------
風神寶寶兒童劇團
台北木偶劇團
夾腳拖劇團
---------------
#Sio招來看戲 專欄，本文使用教育部推薦漢字kap台羅。
#台文通訊BONG報 351期，2023年6月出刊。
歡迎捐款贊助 #李江却台語文教基金會 （捐款可抵稅，匯款後請通知02-23112199）
郵政劃撥：19021486 戶名：財團法人李江却台語文教基金會
電匯：123-20-050514-2 華南銀行士林分行活儲 戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
Comments