囡仔出世tè siáng姓？
作者：陳育萱
囡仔總算出世--ah！逐家lòng tsiok歡喜--ê！Beh號啥mih名？Ueh！小等--一-下！Beh姓啥？
「廢話！Tse a̍h-tio̍h問？當然是kap爸爸仝款--啊！」
「因為逐家lóng án-ne--啊！而且lán是一家伙仔，當然ài仝姓m̄-tsiah有歸屬感。」
Kám真正是án-ne？
舊年tī家族ê群組內底，序大人leh講beh修族譜，各房親tsiânn將厝內ê大大細細，啥人結婚koh生幾个囡仔叫啥mih名lóng交代--出-來，tsiah知影講一个細漢鬥陣tshit-thô ê叔伯小弟m̄-nā已經結婚，koh生兩个囡仔，lóng無通知mā無來往，哪ē án-ne？阮媽媽hit沿--ê無的確知影，阮確實m̄知，當然mā無陪tè，可能逐家lóng有家己ê生活，加上現代人注重隱私，對家族ê概念有tsiânn大ê變化。In lóng無通知--我真正有淡薄仔傷心，有血緣但是lóng無來往，紅帖就無--ah，白帖無的確mā無，平常時仔無聯絡，án-ne有親人iah是無，kám有啥mih無仝？
Ta̋nn leh思考家族意義ê時tsūn，有長輩竟然講其實女性無leh入族譜，阮阿姑應講，tsit-má兩性平權，tsit款做法是無時行，應該去反應tsiah tio̍h！修族譜ê人就是講阮家族kan-na男性tsiah有入族譜。
家族是透過血緣ê「會員認證」，保護族人共同享受資源kap負擔義務，若是查埔tsiah ē-tàng入族譜，án-ne查某算啥mi̍h？Tse是完全以男性為中心思考ê做法，設使女性一定ē結婚，嫁--出-去了後，ē入外姓ê族譜，啊若無結婚--leh？Tsit-má無結婚ê人外口滿滿是，加上多元成家等等，kám講in lóng是「空氣」？孤魂野鬼？無資格記載tī任何族譜內底？Koh再講，阿公阿媽ê時代，因為各種因素，hōo人抱去飼--ê mā真濟，án-ne講--起-來，族譜kám絕對是正確值得lán信任？無屬於任何一本族譜，尤其無結婚iah是離婚ê女性，kám講in就應該死無人拜？Án-ne實在tsiok奇怪、tsiok無公平--neh。
古早人結婚是為著傳宗接代，囡仔就是「香火」。2008年進前，囡仔出世無特別狀況譬如爸母離婚等等，是強制tè老爸姓，尾--à修法了後，變做ē-tàng約定beh tè老爸iah是tè老母姓，若是無法度決定，ài去戶政事務所liam-khau。囡仔20歲以後，若beh改姓，ē-tàng家已去改一擺。
照án-ne來講，tsit-má應該已經是兩性平權ê時代--ah，m̄-koh根據內政部戶政司統計資料，2023年1--月到7--月出世ê囡仔，tè老爸姓ê人有94.4％，tè老母姓ê人占5.6％——tè老母姓ê人數雖然沓沓仔升kuân，比例上猶原比tè老爸姓ê囡仔少真濟；其中tè老母姓ê人內底，查某囡仔比查埔囡仔濟。查某囝tè老母姓ê比例khah kuân，去了解選擇tè老母姓ê家庭，in大部份是講一胎已經有人「thn̂g香火」--ah，第二胎以上、iáu是查某囡仔，ē-tàng hōo人接受tè老母姓ê機會khah kuân——tse是對女性無公平，但是普遍存在ê現象。
我一个叔伯阿兄ê第二查某囝，按算hōo伊tè老母姓，想bē到一下講--出-來，in老爸老母非常反對，in某為著家庭和諧mā無贊成，身軀邊大部份有tsit款想法ê有志，就算夫妻講好--ah，無一定lóng ē-tàng爭取成功，冤家冤kah beh離婚--ê mā有。Tè老母姓bē輸kā人搶金孫、搶香火！Mā有人感覺囡仔tè老母姓，翁婿親像是hōo人招--ê，真見笑。若kā父權男性為中心ê想法放下，tè老爸iah是老母姓lóng是爸爸媽媽ê心肝仔寶貝囝，lóng真正常、真自然，根本無需要特別去爭取kah解seh tsiah tio̍h。
自從無意中發現族譜ê記載方式m̄是lán想--ê hiah-nī正確了後，我問家己，阮大漢後生無tè我姓，我kám有疼--伊？當然mā有，án-ne若無仝姓，kám講老爸就無疼囡仔？兩个囡仔無仝姓，到底ē影響著啥人？出去kap人交朋友根本無人tshap你tè啥人姓，án-ne……第二个囡仔kám有可能爭取tè老母姓？法律上，姓啥mi̍h無影響繼承權。信仰上，我kap阮翁lóng是基督徒，無需要考慮祭拜ê問題，到底有入族譜--無，對我來講無hiah-nī重要，有血緣但是無感情mā是無效！無需要用族譜來加添血統純正kap認同。
上尾一點，就是上困難ê「情感因素」，序大若講啥mi̍h lóng無願意接受，畢竟囡仔m̄是阮一个人--ê ，ài逐家願意理解、接受，協調hōo好勢tsiah好，法律規定ē-sái，suah無人án-ne做，kám講是kā逐家講lán ê社會無tsit款需要？Tse就是兩性平等--啊！我iáu是tsiok想beh爭取看māi。先挑戰阮翁，按算伊無同意我就放棄，伊聽了驚一tiô！我無逼--伊，是希望伊想看māi，到有一个機會koh問--伊，伊竟然同意--ah！
我將女性無法度入族譜，koh有叔伯阿兄想beh查某囝tè in某姓suah失敗ê代誌kā阮翁kap ta-ke講，了解in ê想法，阮ta-ke講in古早散食，查某囝無thang讀書，ài tàu作穡，厝內有欠錢--ê ài tàu還，ài tàu出小弟小妹ê學費，叫你付出、犧牲ê時tsūn就是仝姓一家伙仔，beh pun好處ê時講「查埔囝得田園，查某囝得嫁粧。 」你就是beh嫁--出-去--ê，叫查某囝ài放棄繼承，實在tsiok無公平。M̄-koh阮猶原m̄敢問出喙，驚伊無同意就代誌大條，ta-ke、新婦感情出問題。
就án-ne無人敢開喙，拖到囡仔出世，真正ài去報戶口--ah，一定ài問看māi，無，ē後悔，mā m̄知是啥mih好運，阮ta-ke竟然隨就答應。阮老爸老母雖然感覺我án-ne kap人無仝款，囡仔若hōo別人問是按怎無仝姓beh按怎？尾--à mā是尊重阮ê做法，實在真感謝。阮用行動來支持、爭取女性ê權利，希望lán ê社會愈來愈進步，tè老爸iah是老母姓lóng真正常，囡仔beh tè啥人姓，m̄免靠運氣，ē-tàng照囡仔爸母ê共識來號，án-ne tsiah是真正ê平權。
---------------
#囡仔出世tè siáng姓？ 本文使用教育部推薦漢字kap台羅。
#台文通訊BONG報 358期，2024年1月出刊。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486
戶名：財團法人李江却台語文教基金會
電匯：123-20-050514-2 華南銀行士林分行活儲
戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
Comments