Kap人無仝款tsiah趣味 ——腔口是阮對故鄉ê感情

Kap人無仝款tsiah趣味 ——腔口是阮對故鄉ê感情

作者：#陳育萱 (「樂暢親子共學空間」ê頭家 ) 文章電子檔：https://tsbp.tgb.org.tw/2015/03/kaptsiah-e.html#more

「Ueh ueh！頭家！你kám bē感覺hit本有聲冊，有一寡發音真特別？親像一家人（tsi̍t ke lâng）、妹妹（bē-bē）等等，阮兜m̄是án-ne講--neh！」自從開始學習台文了後，一直tī台語內底走揣家己對土地ê認同：我是啥mih人？我tuì佗位來？是按怎老師ê教材內底kap阮兜講--ê無啥仝款？台語對我來講是啥mi̍h？我是按怎ài講台語、學台文？做tsit寡代誌有啥mih意義？ Tsit-má教育部、台語台kap真濟作品，大部份lóng是「高雄腔」、「偏漳腔」khah濟；因為講ê人數khah濟，mā有人講是「通行腔」、「強勢腔」、「優勢腔」，無論按怎講，lóng m̄是leh講阮兜ê腔口！心內感覺真無爽快，m̄是想beh kap人sio爭啥人強勢，是驚若是無人流通，阮兜ê聲音就ē無--去。進前我bat用地區去分，親像用「台北腔」、「新泉腔」做主題，做一寡作品kap辦活動，落尾發現án-ne分mā m̄-tio̍h。因為台北有tsiok濟中南部起--來ê家庭，in是蹛tī台北、講南部腔ê台北人--neh！若以偏漳kap偏泉來分類，偏泉腔除了新泉腔、老泉腔tsit款大分類以外，iáu-koh有koh-khah幼路ê精差。有一擺我去演講ê時tsūn，一位sia̋n-pái提出講：「你講--ê明明是安溪腔，是按怎一直講家己是台北腔？」阮兜到底算啥mih腔？我到底leh揣啥mi̍h？實際上，腔口透lām、逐家互相影響是真自然ê代誌，除非一世人蹛tī一个真封閉ê所在，無kap人接觸，資訊流通tsiok慢、khah無受著外界ê影響，腔口tsiah有可能lóng無變化。若對隔壁國日本有淡薄仔了解ê人就知影，日語官方對外是以東京腔為主，外國人tī課本學--ê lóng是東京腔，m̄-koh，逐个地方lóng有家己ê腔口kap慣勢ê講法——tse就是語言活--leh ê證明，地方ê腔口並無因為官方通行東京腔就無--去。充滿地方特色ê腔口，m̄-nā是lán對故鄉情感ê連結，mā是語言多元化重要ê元素。M̄-koh……是按怎華語無tsit个腔口差別ê問題？自台灣頭到台灣尾，逐家lóng講仝款、寫仝款？He是因為華語tī台灣m̄是自然發展、是用伊內底ê一種腔口，透過政府來統一使用，語言本身是中性平等--ê。到大漢tsiah知影，原來講華語mā無khah高級--neh！逐家lóng想beh做老大，無人甘願做細漢，啥mih本土語言代表台灣？啥mih腔代表台語？按怎ê書寫系統khah有代表性？Tiānn-tiānn變做冤家sio戰ê話題。語言kap文字若無人使用，就ē無--去；腔口mā是仝款，若是無人使用，就ē失去活力；本土語言ê保存kap傳承已經真無簡單，beh按怎保護khah少數ê語言iah是腔口，我認為就kap古早ê台灣仝款，mài用分類ê貼紙去kā人貼，ài先了解按怎是腔口差別，佗一款是真正講m̄-tio̍h。M̄-nā ē-tàng深化lán對故鄉ê了解kap情感，對家己mā ē koh-khah有自信，對台灣文化kap語言ê多元化lóng真有幫贊。真tsia̍p聽人講起lán需要「台語委員會」，需要預算等等，坦白講我感覺án-ne無夠，所有ê本土語言需要--ê是koh-khah kuân級數、國家級ê單位，去做完整、有系統ê規畫khah好，m̄-thang變做腔口互相競爭、本土語言之間互相競爭。Beh按怎避免政策kan-na做表面，預算kap政策ê監督lóng真重要，逐家ài互相了解、互相尊重，每一種語言kap腔口lóng有伊無法度代替ê重要性，lóng真有價值。經過tsia-ê自我覺醒ê過程，我tsiah了解，原來我想beh保留--ê m̄是「台北腔」、mā m̄是「偏泉腔」，是想beh保留、傳承阮兜對台語ê印象、講法kap感情，隨人照厝內ê講法，無愛koh去強調阮兜講--ê是啥mih腔，事實是逐家lóng lām leh講--ê khah濟。以使用ê人數來講，凡勢有「人數ê優勢腔」，he無表示其他--ê就是「弱勢」，kap華語比--起-來，逐家lóng真弱勢。後擺，beh批評人講m̄-tio̍h進前，可能ài先想看māi，tse kám是腔口差？M̄-thang感覺家己ê講法、寫法，tsiah是上高尚、上正確--ê，án-ne實在無夠開闊。上尾，我想beh對堅持講家己ê話ê人表達敬意，無仝款tsiah趣味！腔口就是lán對故鄉ê感情！